Берҙәмлектә беҙҙең көс. Республикала ошо исемле проект ғәмәлгә ашырыла. Уға ярашлы, Украинала барған махсус операцияла ҡатнашыусы һалдаттар, батырҙарса һәләк булған геройҙарҙың ата-әсәләре махсус дауаланыу курсын үтә ала. Ентекләберәк БЮТ хәбәрсеһе Әлфинә Килдейәрова.
Һыу – яҡшы дауа, тигән фекерҙә белгестәр. Нөрлө ауылында урынлашҡан психотерапия үҙәгендә һыу ярҙамында бер нисә дауалау ысулы ҡулланыла. Рәлиф Хөснетдинов бында ҡатыны менән дауалана. Афған һуғышы ветераны Украинала барған махсус операцияла улын юғалтҡан. Психотерапия үҙәгендә ул тәнгә генә түгел, йәнгә лә дауа эҙләй…
«Воин» Бөтә Рәсәй хәрби ветерандары йәмәғәт ойошмаһының төбәк бүлексәһе республика клиник психотерапия үҙәге менән «Берҙәмлектә беҙҙең көс» исемле проектын ғәмәлгә ашыра. Уның сиктәрендә махсус операцияла ҡатнашыусыларға һәм уларҙың ғаилә ағзаларына бушлай реабилитация үткәреү мөмкинлеге булдырыла. Тәүгеләрҙән булып бында дүрт ғаилә дауаланыу үтә.
Табиптар әйтеүенсә, Афған һәм Чечняла барған хәрби бәрелештәр тамамланғас, ветерандарға реабилитация үтеү, ҡаты күңел йәрәхәтен баҫыу кәрәклеге билдәләнә. Ул ғына ла түгел, ветерандың ғаиләһе лә махсус терапияға мохтаж. Республика клиник психотерапия үҙәгендә дауаланыу курсы 10-14 көн дауам итә.
Әле «Берҙәмлектә беҙҙең көс» реабилитация үткәреү проектын камиллаштырырға һәм Президент гранттары фонды ойошторған конкурста ҡатнашырға ниәтләйбеҙ. Грант отҡан ваҡытта, дауалау курсын яңы процедуралар менән тулыландырыу күҙаллана.
Илья Рыбаков, «Воин» Бөтә Рәсәй хәрби ветерандар йәмәғәт ойошмаһы төбәк бүлексәһе етәксеһе
Бындай реабилитация барлығы тураһында хәбәр итеү маҡсатында республиканың район-ҡала хакимиәттәренә хат ебәрелә. Тәүгеләрҙән булып Салауат районы яуап бирә. Яҡын арала Балтас, Баҡалы, Ҡырмыҫҡалы, Күгәрсен райондары һәм Салауат ҡалаһынан тиҫтәләгән ғаилә килеүе көтөлә.
Пресс-служба Министерства здравоохранения Республики Башкортостан (информация БСТ)
